Ոչ թե ընդմիջում թատրոնում, այլ <<թատրոնի ընդմիջում>>

Վաղուց չէի գրում: Դե հիմա… Կարծես չգիտեք , թե մոսկվացիներն ինչքան զբաղված են …(սուտ)

Ուղղակի ընդհատակ էի անցել, այտեղից աստղերին նայելն ավելի դժվար է, բայց ավելի հետաքրքիր է , քան երկրի վրա, ինչևէ, խոստովանեմ , թե ինչը դրդեց դուրս գալ ընդհատակից:

Ռեպորտաժ էի պատրաստում հայկական թատրոնի պատմության ու ավանդույթների մասին: Առհասարակ, մեր հեռուստաընկերության քաղաքականությունը (Հայ-Ռուսական հեռուստալիքը) ստիպում է մեր մշակույթի գանձերը սովորականից վառ ներկայացնել, քանի որ մեզ դիտում է ոչ միայն մեր սփյուռքը: Այս անգամ ինձ ոչինչ ուռճացնել չպահանջվեց, քանի որ մեր թատրոնի պատմությունն ինքն իր մասին արդեն ամեն ինչ պատմում է հնարավորինս գունեղ:

Այդ աշխատանքային ոգևորության ամենաթեժ պահին ինձ մոտ հյուր եկավ, և շատ թեմատիկ հյուր` Մոսկվայի հայկական թատրոնի ղեկավար ու ռեժիսոր Սլավա Ստեփանյանը ` Փարաջանովի սաներից: Սլավա Աշոտովիչը սովորականից մռայլ թվաց:  Պատճառը ուներ:

Ռուսաստանում նորանշանակ ՀՀ մեր դեսպանը ` Օլեգ Եսայանը, հայկական թատրոնը ցրելու և  իր ողջ ունեցվածքով դեսպանատան շենքից դուրս հանելու հրամանագիր է ստորագրել: Եվ այդ հրամանը ստորագրվել է հաշվի չառնելով, որ դերասանները Եվրոպա շրջագայության նախաշեմին փորձերն անցկացնելու տեղ չունեն: Ի դեպ,  այդ հրամանագիրը թվով երկրորդն էր` իր պաշտոնավարման սկզբին: Չգիտեմ , թե որն էր նրա առաջին հրամանագիրը, բայց երկրորդը դեսպանատան ներքո գործող մշակութային օջախը ցրելն էր: Իսկ այդ մշակութային օջախի կրակը հենց թատրոնն էր,  որի գոյությամբ շատերն էին ուրախանում:

Իմ աչքով եմ տեսել այդ հրամանագիրը, մինչև այդ չէի հավատում:  Սլավա Ստեփանյանն էլ չհամաձայնեց հրապարակել այդ հրամանը, կարծելով, որ լավ է լռել, պետք չէ աղմուկ բարձրացնել ու բերեց շատ հասկանալի պատճառաբանում. <<Ամոթ Է: Բա որ մեր թշնամիներն իմանան, ինչքան կուրախանան>>:

Բերիայի օրոք, երևի, հասկանալի էր, երբ թատրոններ էին փակվում: Հիմա չեմ հասկանում: Չեմ ընդունում ոչ մի պատճառ: Օրինական, թե իրավաբանական հիմնավորում չի կարող լինել: Կա կյանքի օրենք, մշակութային էթիկա և ազգային քաղաքական մտածելակերպ, որը չկա:

Ի դեպ Ռուսաստանի հայերի միությունը հիմա հայկական թատրոնին տրամադրել է ժամանակավոր կացարան, որտեղ անցնում են փորձերը: Շուտով հնարավոր կլինի դիտել <<Ոտքի, դատարանն է գալիս>> ներկայացումը` Երևանում: Հայական թատրոնը շուտով կժամանի Հայաստան: